ԷԴ ՀՈՂԵՐԸ ՊԵՏՔ Է ՀԵՏ ՎԵՐՑՆԵՆՔ. ՍՅՈՒՆԵՑԻՆ ԻՆՔՆ ԻՐ ՀՈՂԸ ՉԻ ԹՈՂՆԻ ՈՒ ՉԻ ԳՆԱ ՈՒՐԻՇ ՏԵՂ. ԽՆՁ. ԳՅՈՒՂԱՊԵՏ
- Կարևոր նյութեր
- 8 дек. 2020 г.
- 2 мин. чтения
Ես ասել եմ, որ քաղաքականությամբ չեմ զբաղվել ու չեմ զբաղվում, ինձ համար մեկ է՝ երկրի ղեկավարն ով է, որովհետև այսքան ժամանակ ոչ մեկից ոչ մի բան չեմ տեսել: Այդ մասին «Առաջին լրատվական»-ի հետ զրույցում նշեց Սյունիքի մարզի Խնձորեսկի գյուղապետ Երվանդ Մալունցը՝ անդրադառնալով նրան, որ Սյունիքի համայնքները պահանջում են վարչապետի հրաժարականը:
Հարցին, թե ինքը բացառո՞ւմ է, որ քաղաքական դրդապատճառներով են պահանջում վարչապետի հրաժարականը՝ հաշվի առնելով, որ միայն Սյունիքի համայնքներն են այսպիսի հարց դրել, հնարավո՞ր է նախկին մարզպետներն են հրահրում, Մալունցը պատասխանեց. «Ես չեմ կարծում, որ այստեղ հրահրելու կարիք կա, որովհետև խնդիրը մերն է, համայնքներինն է, բնակավայրերինն է: Այսօրվա դրությամբ սահմանի վրա ապրողն է խնդրի առջև կանգնած: Պետք է մեկը այդ խնդիրների մասին ասի՞, որ բոլորն իմանան, թե ինչ խնդիրներ կան»:
Անդրադառնալով գյուղի արոտավայրերի խնդրին, որոնք անցել են հակառակորդի տրամադրության տակ, գյուղապետն ասաց. «Էդ հողերը պետք է հետ վերցնենք, որ արոտավայրերի հարցը լուծվի, ու կարողանանք անասուններին պահել: Դրանք ազատագրված տարածքներն են Խնձորեսկին կից:
Սյունիքն, ընդհանուր առմամբ, նման խնդրի առաջ կանգնած է, ուրիշ մարզերից են գալիս անասուններին առնում տանում, հիմնականում եզդիներն են տանում: Դե, եթե հնարավոր լիներ մեզ մոտ պահել, հենա մեր ժողովուրդը կպահեր, չէր վաճառի: Արոտավայր չկա անասունը մեզ մոտ պահելու համար»:
Հարցին, թե բա ինչով են զբաղվելու խնձորեսկցիները, գյուղապետն արձագանքեց. «Հիմնականում երիտասարդները ինքնապաշտպանության են, պոստերում կանգնած են: Անասնատերերը վաճառում են անասուններին, այս տարի կերն էլ է խնդիր, կեր չկա, որ առնեն»:
Նա ընդգծեց, որ պետությունը ինչպես նախկինում, այնպես էլ հիմա որևէ աջակցություն չի ցուցաբերում. «Պետությունը ե՞րբ է աջակցել այս խնդիրներին, որ հիմա աջակցի: Մենք հիմա կանգնած ենք գյուղապետներով, համայնքի ղեկավարով, դրանից բարձր պետության ներկայացուցիչ չեմ տեսել, որ գա, տեսնի, թե ինչ խնդիրներ ունենք»:
Հարցին, թե արդյո՞ք այս իրավիճակում կարող է արտագաղթը մեծանա Սյունիքից, նման տրամադրություններ կա՞ն, Մալունցը պատասխանեց. «Ոչ, չեմ նկատում, որովհետև սյունեցին ինքն իր հողը չի թողնի ու չի գնա ուրիշ տեղ: Ընդհակառակը, հիմա ավելի պետք է համախմբվեն, կենտրոնանան ու պաշտպանեն Սյունիքը: Մենք ամեն ինչ պետք է անենք, որ դրսից գա բնակչությունը, տներ սարքեն, լավ բաներ անեն, երիտասարդները չթողնեն գնան: Ի՞նչ գնալու մասին է խոսքը»:
Comments