Երևանի նոր քաղաքապետը

Վրացական 10 հասցեում 20 օր առաջ տեղի ունեցած պայթյունից հետո սկսվել են մուտքի վերանորոգման աշխատանքները: Բնակիչները NEWS.am-ի հետ զրույցում ասել են, որ աշխատանքներն էլի չէին սկսվի, եթե «Երկիր Ծիրանի» կուսակցության նախագահ Զարուհի Փոստանջյանին չհրավիրեին, և վերջինս չբարձրաձայներ խնդրի մասին:

«Եթե Զարուհի Փոստանջյանը չգար, չնկարեր, էլի չէին գա փորձաքննության համար չափ ու ձև անեին, կամ էս մուտքի վերանորոգումն էլ չէր լինի: Միայն Զարուհու գալուց հետո սկսեցին տեղից շարժվել», ասել է պայթյունից տուժած բնակիչ Էրիկ Հովհաննիսյանը:

Երևանի ավագանու վերջին նիստում սկանդալային միջադեպից հետո լուծվել է Նուբարաշենի կոյուղագծի հարցը: Բնակիչները տևական ժամանակ բողոքում էին գարշահոտից, հարցը լուծում չէր ստանում: Երկիր Ծիրանի խմբակցության ավագանու անդամները կեղտաջրերից նմուշ էին տարել Երևանի ավագանու նիստին և այն փորձում էին մատուցել քաղաքապետ Տարոն Մարգարյանին, որից հետո էլ տեղի ունեցավ բռնությունը նրանց դեմ:

Բայց միջադեպից հետո հարցը լուծվեց: Հիմա սկսել են աշխատել նաև Վրացական փողոցում պայթյունից տուժած շենքում: Երևի Տարոն Մարգարյանը վախեցել է, որ այս անգամ կեղտաջրի փոխարեն պայթուցիկ են բերելու:

Երկիր Ծիրանի կուսակցությանն օգնության համար դիմել են և շարունակում են դիմել Երևանի տարբեր թաղամասերում տարիներ շարունակ չլուծվող խնդիրներից տառապող բնակիչներ:

Այսպիսով, կարելի է արձանագրել, որ Երևանի իրական իշխանությունը Երկիր Ծիրանի խմբակցությունն է, իսկ քաղաքապետը՝ Զարուհի Փոստանջյանը: Երևանի ՀՀԿ-ական ավագանին ու դե յուրե քաղաքապետը զբաղված են այլ խնդիրներով, որից գալիս է մեկ այլ բույր՝ կոռուպցիայի: Ահռելի միջոցներ են ծախսվում Երևանի համար անպետք ու երևանցիների համար անիմաստ բաների վրա, փոխարենը չեն լուծվում տարրական հարցերը՝ աղբ, գարշահոտ, մարդասպան վերելակներ և այլն:

Նյութի աղբյուր՝ «http://www.lragir.am»